投票不是「無厘投」
[Alternative contribution to Vote04 blog]投票不是「無厘投」
阿貴同响Friends傾偈，發覺有好多個912都將會係第一次有份投票，佢哋有啲好鬼緊張，猛話點投法呀，亂咁投，咪變咗「無厘投」？
其實後生仔又唔係未喺選舉投過票嘅，嗱，好似選班長、學生會會長、甚至勁歌金曲季選，其實都有相同之處，從簡單方面睇起，只要選自己最喜歡嗰個咪得囉！但係亦有唔同之處喎，無可否認，選立法會議員又真係重要得多，而且投票唔係估冠軍，又冇獎品，所以米理人哋點講，自己要知道自己做乜。
又有啲Friends話，個樣靚仔靚女啲咪得囉。嘩，咁都得，當講吓小好啦。不過阿貴唸落，中國人有句話好有智慧，話「相由心生」，即係心地好嘅，樣都祥和啲，順眼啲啦，嗱，班友邊個好樣，邊個樣衰，哈，心裏有數啦！
好啦，睇樣哩瓣，當講嘢啦！講真唯嗰句，梗係要比較政綱立場，但係咁又有兩個問題，第一，你自己最緊張乜嘢東東呢？第二，班友個個講啲嘢都差唔多，唔好個句唔up，好似突之間個個都要直選，個個都愛國，乜至真？
所以，我哋要做精明嘅消費者，呀唔係，應該係精明嘅選民，不過其實原則都一樣啫，Know the fact！點至知道佢哋嘅真面目呢，只要留意我依班搞嘢Friends搞嘅哩個Vote04网站，佢哋會問哂啲候選人各方面立場。至於乜嘢至係對你最重要，就你要自己决定，乜嘢對香港好，唔駛問阿貴啦啩！
吓但係又有Friends話好鬼煩，因為啲候選名單入面，有啲人佢鍾意，但又有啲好鬼憎，點算？鬼叫香港哩個「多議席單票」嘅「比例代表制」，相同信念嘅人為咗多啲同道中人入局，只好估吓一張名單定分開玩可以贏多啲，所以，我哋都要理性啲，為咗自己支持嘅入贏得出，就算佢唔係排第一都要投佢，不要因少失大！相反，如果自己支持嗰個贏梗，張票哂咗亦無謂，所以都要留意吓同區有冇第二個要幫，即係所謂配票，嗱，投票目的都係要make a difference，所以真係要留意吓啲配票安排！
美國上次選總統又好，台灣嗰單又好，票數相距都好細，所以你同我嘅一票都好重要！
投票不是「無厘投」，要投得有道理，投得有骨氣！
posted by Charles Mok @ 4:35 PM
0 Comments:
Post a Comment
<< Home